Numbers 2

Ukuhlelwa Kwezihonqo Ngezizwana

1Jehova wathi kuMosi lo-Aroni: 2“Abako-Israyeli bazahlala ezihonqweni begombolozele iThente lokuHlanganela bucwadlana lalo, indoda ngayinye ngaphansi kophawu lwayo kanye lezibonakaliso zendlu yayo.”

3Empumalanga, isigaba sezihonqo zakoJuda sizakuba ngaphansi kophawu lwazo. Umkhokheli wabantu bakoJuda nguNahashoni indodana ka-Aminadabi.

4Iviyo lakhe lizi 74,600.

5Izihonqo zesizwana sika-Isakhari zibe seduze khonapho. Umkhokheli wabantu besizwana sika-Isakhari nguNethaneli indodana kaZowari. 6Iviyo lakhe lizi 54,400.

7Kulandele isizwana sikaZebhuluni. Umkhokheli wabantu besizwana sikaZebhuluni ngu-Eliyabi indodana kaHeloni. 8Iviyo lakhe lizi 57,400.

9Wonke amadodana akhethelwe izihonqo zakoJuda, ngamaviyo awo, ayizi 186,400. Yibo abazaqala ukusuka.

10Eningizimu kuzakuba ngamaviyo ezihonqo zikaRubheni ngaphansi kophawu lwazo. Umkhokheli wabantu bakoRubheni ngu-Elizuri indodana kaShedewuri. 11Iviyo lakhe lizi 46,500.

12Izihonqo zesizwana sikaSimeyoni zibe seduzane khonapho. Umkhokheli wabantu bakoSimeyoni nguShelimiyeli indodana kaZurishadayi. 13Iviyo lakhe lizi 59,300.

14Kulandele isizwana sikaGadi. Umkhokheli wabantu bakoGadi ngu-Eliyasafi indodana kaDuweli. 15Iviyo lakhe lizi 45,650.

16Wonke amadoda akhethelwe izihonqo zakoRubheni ngamaviyo awo azi 151,450. Bazakuba ngabesibili ukusuka.

17Emva kwalokho kuzasuka iThente lokuHlanganela labezihonqo zabaLevi konke kube phakathi kwamaviyo ezihonqo. Bonke abantu bazalandelana ekuhambeni kwabo njengokuma kwezihonqo zabo kube yilowo lalowo endaweni yakhe ngaphansi kophawu lwakhe.

18Entshonalanga kuzakuba ngamaviyo ezihonqo zika-Efrayimi ngaphansi kophawu lwawo. Umkhokheli wabantu bako-Efrayimi ngu-Elishama indodana ka-Amihudi. 19Iviyo lakhe lizi 40,500.

20Isizwana sikaManase sibe seduzane khonapho. Umkhokheli wabantu bakoManase nguGamaliyeli indodana kaPhedahuzuri. 21Iviyo lakhe lizi 32,200.

22Kulandele isizwana sikaBhenjamini. Umkhokheli wabantu bakoBhenjamini ngu-Abhidani indodana kaGidiyoni. 23Iviyo lakhe lizi 35,400.

24Wonke amadoda ayekhethelwe izihonqo zako-Efrayimi, ngokwamaviyo awo, ayezi 108,100. Bazakuba ngabesithathu ekusukeni.

25Enyakatho kuzakuba ngamaviyo ezihonqo zikaDani, ngaphansi kophawu lwawo. Umkhokheli wabantu bakoDani ngu-Ahiyezeri indodana ka-Amishadayi.

26Iviyo lakhe lizi 62,700.

27Izihonqo zesizwana sika-Asheri zibe seduzane khonapho. Umkhokheli wabantu bako-Asheri nguPhagiyeli indodana ka-Okrani.

28Iviyo lakhe lizi 41,500.

29Kulandele isizwana sikaNafthali. Umkhokheli wabantu bakoNafthali ngu-Ahira indodana ka-Enani. 30Iviyo lakhe lizi 53,400.

31Wonke amadoda ezihonqo zako-Dani ayizi 157,600. Bazasuka ekucineni, ngaphansi kophawu lwabo.

32Laba yibo abako-Israyeli, ababalwa ngezindlu zabo. Bonke labo ababesezihonqweni, ngokwamaviyo abo, inani labo kuzi 603,550. 33AbaLevi bona kababalwanga ndawonye labanye bonke abakoIsrayeli, njengokulaywa kukaMosi nguJehova.

34Ngakho abako-Israyeli benza konke uJehova ayelaye ngakho uMosi; kwaba yiyo indlela abahlala ngayo ezihonqweni ngaphansi kwezimpawu zabo, njalo yiyo indlela ababesuka ngayo nxa sekuhanjwa, munye ngamunye ngesizwana sakhe langendlu yakhe.